25 aprel tarixində MTK-nın akt zalında şagirdlərimizin ifasında görkəmli dramaturqumuz M. F. Axundovun “Hekayəti-müsyö Jordan həkimi-nəbatat və dərviş Məstəli şah cadüküni-məşhur” komediyası ingilis dilində səhnəyə qoyuldu.
Əsərdə hadisələr 1848-ci ildə Qarabağ bölgəsində cərəyan edir. Hatəmxan ağanın Fransadan gəlmiş qonağı, botanika alimi Müsyo Jordan öz vətəninə qayıdandan gənc Şahbazı da özü ilə Fransaya aparmaq istəyir ki, onu təhsili ilə şəxsən məşğul olsun. Lakin Şahbaz bəyin nişanlısı Şərəfnisə və əmisi arvadı Şəhrəbanu xanım müxtəlif yollarla onu bu fikrindən daşındırmağa çalışırlar.
Komediya 1850-ci ildə yazılmasına baxmayaraq, qoyduğu problem, köhnəliklə yeniliyin qarşıdurması daim aktual olaraq qalır. Əsərdə cəhalət və nadanlıq tənqid olunur, elm və maarifçi ideallar isə təbliğ olunur.
Tamaşanın quruluşçu rejissorları, məktəbin ingilis dili müəllimləri İradə Əliyeva və Xədicə Cəfərova qeyd edir ki, onların əsas məqsədi şagirdlərimizi əsərin klassik forması ilə tanış etmək olduğundan ssenariyə edilən əlavələr (Şərəfnisənin yuxusu, Məsətli Şahın cinlərlə rəqsi və s.) sırf gənc auditoriyada əsərə marağın oyadılması və komik elementlərin gücləndirilməsi ilə bağlıdır.
Kompleksimizin şagirdləri dahi dramaturqumuzun sevilən əsərini böyük həvəslə ifa etməklə dramaturgiyamıza verdiyimiz dəyəri bir daha nümayiş etdirdilər.
Səhnə əsərində məktəbin şagirdləri Koroğlu Rəhimli (Hatəmxan ağa), Dəniz Tağıyeva (Şəhrəbanu xanım), Casmin Saramanova (Şərəfnisə), Qabil Kərimli (Şahbaz), Vaqif Hacıyev (Müsyo Jordan), Polad Fərhad (Məstəli Şah), Aidə Zeynalova (Gülçöhrə), Nəzakət Əliyeva (Xanpəri) və digərləri iştirak ediblər.